「趙」為本人　「家」為求知慾強的家長

家：趙Sir，我取了幾間幼稚園的申請表要求我填的資料，與我個仔的申請似乎一啲關係都冇，想請教趙Sir應否全部都填。

趙：幼稚園要求你填些甚麼？

家：這一間要填「行業」、「職業」、「公司名稱」、「公司地址」，其實填咁多對學校是否取錄我個仔有冇關係？

趙：表面睇來好似冇，但諗深一層卻是有的！我就聽過一間名小學要求家長填「職業」，有一位家長填上「醫生」，喺家長面試時，校長便「單刀直入」問該家長是否肯幫忙學校做該校暑期到英國的「遊學團隨團醫生」，「醫生」家長立即答「肯」，佢個仔便順利入咗這間名校了。所以，我相信幼稚園叫家長填這一項，不是無的放矢的，因為填「正」幼稚園將來有需要你幫忙的職業，便增加個仔入學的機會。

家：原來係咁。仲有，張表格又要我透露我和妻子以前讀過的小學。如果我以前讀嗰間小學已經被「殺校」，會否影響我個仔入讀的機會？

趙：如果你個仔將來報讀官津小學會有好大影響的，因為報官津小學自行分配用「世襲」同「計分」來收生，如果你間小學被「殺」，即係已經停辦，你個仔便在「計分」表上得零分，計埋係「長子」及適齡兒童，只得15分，用15分來申請入名校，機會甚低，所以會對幼稚園的取錄有些影響，除非你將來申請直資小學。

家：點解申請直資好啲？

趙：因為直資不理父母以前讀邊間小學，只理會面試表現！

家：仲有仲有，張表格要我填「兄姊」以前讀過邊間小學，是否又有「玄機」？

趙：當然有。因為官津小一入學指引中，自行分配有一部分是「世襲」入學的，即是只要哥哥或姊姊在該小學讀緊，弟弟、妹妹如果申請入讀該小學，便一定入到！

家：一定入到？如果「自行分配」的「世襲」部分學位唔夠呢？

趙：如果「世襲」學位唔夠，便會從統一派位中取過來，唔夠5個便取5個，唔夠10個就取10個。

家：明白。原來表格上「玄機」甚多，現在我知道該點填了。多謝趙Sir指點迷津！