趙為本人　家為自以為「無路可走」的家長

家：趙Sir，目前情況惡劣，沒有一間直資和私立小學收我兒子，咁冇學校收點算？

趙：喺香港，只要係合資格的小朋友，都一定可以入讀受資助的官立或津貼小學，唔知道你有冇幫佢參加小一派位？自行分配學位已於十一月二十三日放榜，派唔派到？

家：就係派唔到，個仔冇學校肯收，我好徬徨！

趙：明白。你咁徬徨，係因為你以為天下咁大，竟然找不到一間小學肯收你個仔！其實不是如此淒涼，因為香港實行「九年強迫免費教育」，就算直資、私立小學唔肯收你個仔，只要肯讀官津小學，就一定有學位。你可以於開學前到教育局學位分配組或各區分署，請職員協助找學位便可。

家：但嗰啲學位一定喺其他人揀剩嘅學校學位，我想搵啲好嘅學位！

趙：冇問題！我想你知道「辦法總比困難多」，你以為無路可走，其實是自己製造出來的。你嘅問題唔係冇學校肯收個仔，而係冇你心儀嘅小學肯收個仔。

家：係喎，我好似鑽咗入牛角尖自己都唔知。咁點樣幫個仔搵間心儀嘅小學呢？

趙：搵間心儀嘅小學，先要個仔夠程度報考「中、英、數」三科筆試。因為我介紹呢個方法，叫做「插班」，而大部分名小學嘅「插班試」，都需要考中、英、數三科筆試及面試。

家：咁點樣申請考「插班試」？我未聽過有這種考試。

趙：「插班試」分兩種，一種係「隨意式」插班。當校長發現有學位空出時，便第一時間邀請申請插班嘅小朋友來學校考筆試。只要過了筆試及面試，便會立即被取錄。但因為冇人知道何時何日會有學位空出，因此家長便要在八、九月時，以「亂石投林」的方法向心儀小學寄出申請信，希望一擊即中。因為對手不多，所以「亂石投林」比較容易奏效讀。另一種方法，是在每年四至六月上心儀小學的網站下載插班申請表格報名。這個「正式」的方法，對手比較多，較難成功。不過無論對手多少，也總算有多一個入讀心儀小學的機會。

家：原來仲有呢啲招數可以入讀名小學，咁我都冇咁驚。等我同個仔攪好啲中、英、數，再用「亂石投林」去插班！

趙：希望在人間，祝你好運！

家：多謝趙Sir！