趙：為本人
朋：為教仔苦惱的朋友

朋：Peter，我最近同太太因教仔而不和，她對個仔千依百順，個仔要買手機就立即買，冇幾耐個仔見朋友換咗個新型號，佢立即叫媽媽換個新嘅。波鞋又係咁樣，着得好地地，冇穿冇爛，同學換，佢又要換。太太初期勸個仔遲啲先換，個仔唔肯，發脾氣，結果換咗！我覺得咁樣唔係辦法，因為太浪費喇！但太太話我哋只得一個仔，應該比佢最好嘅，我都唔知點好。你話我係咪應該同老婆企喺同一條陣線？

趙：你感到苦惱嘅原因係你唔同意太太太過順個仔意。其實你太太亦對個仔換對着咗冇幾耐嘅波鞋有意見，但經唔起個仔發脾氣，終於依從咗個仔嘅意思。你想反對，但太太話你應該錫個仔，因為你哋只有一個仔，既然你哋比得起，為何咁「孤寒」，係唔係咁樣？

朋：冇錯，我始終覺得個仔話要乜，我哋就買乜比佢呢個做法有問題，但又唔知喺邊度要停止！

趙：冇錯，我哋做父母嘅，係要有理性咁提供仔女生活上嘅需要，而唔係個仔話要乜就比乜佢。換句話說，我哋要劃條「紅線」，一條理性嘅「紅線」，例如：手機未壞、未舊到唔用得，就唔需要買新嘅。同樣，波鞋未爛，未着到唔行得，就唔需要買新嘅，原因係手機同波鞋係買來用嘅，唔係用來買來向同學炫耀嘅。換句話說，用實用性來劃條「紅線」，過咗呢條紅線就唔買。

朋：但唔買個仔會發脾氣，而太太唔識得點樣應付佢大喊、大叫或唔睬佢，每次都舉手投降！

趙：首先，你哋兩個要知道「錫」同「縱」嘅分別，「錫」係喺紅線以內嘅嘢你都買比佢；「縱」係喺紅線以外嘅一切你認為唔理性、不符合common sense嘅嘢都買比佢，你哋要企硬 say no！如果個仔發脾氣，你向佢解釋；如果唔聽，就叫佢「面壁」三分鐘想清楚。只要你哋企硬，個仔就「受教」，受教先至令佢學到紀律、對人嘅尊敬；如果你哋讓步，個仔便會比你哋「縱壞」，咁佢就永遠學唔到節制、紀律同禮貌，到大個想再教佢，恐怕唔易。所以，教仔要從「劃紅線」做起！

朋：明白！不過我仍要同太太商量才作決定！