08.2020 • Column
家長是「造王者」
有一位家長因為兒子派位不理想，擬往「叩門」，但又覺得有失尊嚴，為了糾正他的想法，我和他有了以下談話：
趙為本人 家為家長
家：我唔想去叩門，因為好似「沿門托缽」去乞個學位咁！
趙：錯了，你是否知道小學校長非常想家長「叩門」？
家：校長見到家長「叩門」，應該覺得好煩，點解非常想見到佢地呢？
趙：因為小學校長喺小一派位過程中，不但沒有參與，而且從「自行分配」到「統一派位」這兩個階段，都沒有話事權。
家：唔明，我哋家長將張「小一申請表格」交俾小學，唔係由校長批准與簽收咩？
趙：當然唔係啦。表格所有資料應該由小學啲文員核算嘅；核對完畢，亦應由秘書或文員蓋上校章。而統一派位，全部由教育局一手辦妥，校長似乎未出現過(never come into the picture)。除非是「自行分配」階段25分嘅數目超過「限額」要抽籤，才勞煩教育局代表來抽，由校長來監督。試過有一次，有老師找到校監替他兒子向學校寫介紹信，「自行分配」放榜竟然落空。老師走來問我點解校長唔俾面個校監，我告訴他，介紹信應該喺六月放榜日交俾校長，因為校長由九月至六月放榜前，都冇權收生！
家：係咩？校長竟然一個學生都冇權收？
趙：係呀！幼稚園校長、中學校長都有權收自己喜愛的學生，唯獨是小學校長，由九月至六月統一派位放榜前都冇權收學生，直到「叩門」，校長先至有權收自己喜愛嘅學生。你話嘞，小學校長是否非常想見到來「叩門」嘅家長呢？
家：咁樣又似乎有啲理由！
趙：因為喺「叩門」這階段，校長才真正似一個校長，可以親自收一個自己想收嘅學生。之前，校長不似一個校長，換句話說，透過「叩門」，家長似乎是個「造王者」(The King Maker)！
家：如果係咁，我就唔怕去「叩門」了！多謝趙Sir指點迷津！
趙榮德
現為輔導教師協會顧問，曾任喇沙書院副校長。關心香港教育，於《明報》、《星島日報》、《公教報》撰寫專欄，出版著作甚豐，有《不一樣的家長》、《趙Sir教英文》等。
電郵：chiu24@gmail.com